17. nóvember 2010

Menntun og skemmtun - Örfyrirlestur um Mjólkurskólann á Hvítárvöllum

Mennta-og menningarhúsið í Borgarnesi verður opið gestum og gangandi laugardaginn 20. nóvember kl. 13.00 til 17.00.

 

 

Í tilefni þess að sveitarfélagið er að eignast Mennta-og menningarhúsið verður blásið til hátíðar í húsinu þar sem leik-, tón-, grunn-, mennta- og háskólar héraðsins kynna sig á skemmtilegan hátt. 

 

Auk þess munu menningarstofnanir eins og Landnámssetur, Brúðuheimar, Safnahús, Landbúnaðarsafnið og Snorrastofa taka þátt í hátíðinni að ógleymdum hinu áttræða en síunga Rúv, Símenntunarmiðstöð Vesturlands og nýstofnuðu dansstúdíói Evu Karenar.

 

Á vegum Landbúnaðarsafnsins mun Bjarni Guðmundsson halda örfyrirlestur um Mjólkurskólann á Hvanneyri og Hvítárvöllum - eina fyrstu starfsmenntabraut sem konur eignuðust hérlendis. Hún opnaðist fyrir réttum 110 árum.

 

Yfirskrift hátíðarinnar ber með sér áherslu á að menntun er skemmtun og þeir sem koma á hátíðina fá skemmtun á stóra sviðinu í salnum en einnig verður boðið upp á örfyrirlestra um ólík og áhugaverð málefni.  Heitt verður á könnunni og allir eru velkomnir.