6. september 2011

Málþingið að Fitjum í Skorradal - Dagskrárauki!

Nú styttist í málþingið að Fitjum í Skorradal um hann Guðmund Ólafsson. Það verður nk laugardag og hefst kl. 14.

 

Okkur er sérstök ánægja að kynna unga og efnilega tónlistarmenn sem munu koma fram á málþinginu og auka fjölbreytni efnis sem þar verður flutt, sjá fréttatilkynninguna hér á eftir:

 

Laugardaginn 10. september nk. verður haldið málþing að Fitjum í Skorradal um Guðmund Ólafsson jarðræktarmann sem þar bjó lengi. Guðmundur var fæddur að Setbergi við Hafnarfjörð árið 1825 en lést að Fitjum árið 1889. Hann var einn af best menntuðu búfræðingum sinnar tíðar; nam búfræði um fjögurra ára skeið í Danmörku. Guðmundur varð áhrifamikill á því sviði, bæði sem ráðunautur og höfundur búfræðirita. Þá var hann um skeið alþingismaður Borgfirðinga. Guðmundur var samverkamaður Jóns Sigurðssonar forseta, og naut hvatningar hans í starfi sínu.

 

Á málþinginu verða flutt þrjú erindi um Guðmund: Karólína Hulda Guðmundsdóttir á Fitjum og afkomandi Guðmundar mun segja frá Guðmundi og fjalla um helstu æviatriði hans. Ingi Sigurðsson frá Reykjum í Lundarreykjadal, prófessor í sagnfræði, mun skoða fjórar ritgerðir Guðmundar um búnaðarmál í sögulegu samhengi. Þá mun Bjarni Guðmundsson prófessor og safnstjóri á Hvanneyri fjalla um nokkrar jarðræktarhugmyndir Guðmundar, efni þeirra og áhrif.

 

Í dagskránni munu tveir ungir tónlistarmenn, þeir Magnús Hallur Jónsson og Bjarni Frímann Bjarnason, sem báðir eru við nám í Hans Eisler-tónlistarháskólanum í Berlín, flytja íslensk lög. Magnús á ættir að rekja í Fram-Skorradal. Langafi hans var Höskuldur Einarsson bóndi í Vatnshorni í Skorradal og fyrrum forsöngvari í Fitjakirkju.

 

Málþinginu mun stjórna Bergur Þorgeirsson forstöðumaður Snorrastofu í Reykholti.

 

Málþingið verður haldið í Skemmunni á Fitjum. Það hefst kl. 14 og er gert ráð fyrir því ljúki um kl. 16.  Á boðstólum verður miðdegishressing. Gjald fyrir þátttöku í málþinginu verður kr. 500,- Miðdegishressing er innifalin í þátttökugjaldi.

Það eru afkomendur Guðmundar Ólafssonar á Fitjum og Landbúnaðarsafn Íslands á Hvanneyri sem að málþinginu standa, með atbeina Snorrastofu í Reykholti.