2. júlí 2012

Safnadagur 8. júlí - Mjólkursagnaganga ofl.

Hinn árlegi Safnadagur er að þessu sinni haldinn sunnudaginn 8. júlí nk.  Að venju verður verður af því tilefni gerður nokkur dagamunur í Landbúnaðarsafninu á Hvanneyri.

 

Safnið verður opið kl. 12-17.

 

Aðgangur er að safninu verður ókeypis á Safnadegi en frjáls framlög gesta til safnsins eru þegin með þökkum.

 

Leiðsögn verður veitt í safninu og um Halldórsfjós, sem brátt mun væntanlega hýsa aðalsýningu safnsins.

 

Kl. 14 verður sagnaganga um gamla skólastaðinn á Hvanneyri, þar sem m.a. má sérstætt og merkilegt dæmasafn íslenskrar húsagerðarlistar frá öndverðri síðustu öld.

 

Sérstaklega verður sagt frá Halldórsfjósi svo og Mjólkurskólanum sem stofnaður var á Hvanneyri haustið 1900, og opnaði eina fyrstu starfsmenntabraut kvenna á Íslandi – fyrir rjómabústýrur. 

 

Myndin sýnir tilgátumynd af skólahúnsunum á Hvanneyri á þeim árum; Mjólkurskólinn er dökka húsið ... stækka má myndhornið með bendlinum.

 

Á göngunni verður líka kynnt nýtt göngu- og reiðleiðakort af landi Hvanneyrar. Sögumaður verður Bjarni Guðmundsson. 

 

Kl. 14-17 verður vöfflukaffi fáanlegt í Skemmunni, elsta húsi staðarins, sem nú hefur verið pússað upp og gert að safnaðarheimili og annarri félagsaðstöðu skóla og staðar.

 

Á Safnadeginum á Hvanneyri fer á sama tíma einnig fram landskeppnin Ull í fat. Keppnin er að þessu sinni á vegum Ullarselsins.  

Eins og heiti keppninnar gefur til kynna verður þar keppt í ullarvinnslu frá hráefni til fullunninnar vöru. 

 

Ullarselið hefur verið sigursælt í þessum keppnum á undanförnum árum, þar sem glímt hefur verið við vinnslu og gerð hina athyglisverðustu ullarplagga.